+++++++++++++++++++++++++
ဘုရားရှင်လက်ထက်တော်အခါ ဤသီတင်းကျွတ်ကာလတွင် ဗုဒ္ဓမြတ်စွာသည် တာဝတိံသာနတ်ပြည်သို့ ဝါတွင်းကာလပတ်လုံး ကြွရောက်၍ တရားတော်မြတ်များ ဟောကြားချီးမြှင့်အပြီး လူ့ပြည်ဖြစ်သော “သင်္ကဿ” မြို့သို့ ရွှေစောင်းတန်း ငွေစောင်းတန်း တို့တွင် နတ်ဒေဝတာများခြံရံလျှက် ပတ္တမြားစောင်းတန်းမှ ပြန်လည်ကြွချီတော်မူခဲ့သည်။ ထိုသို့ ကြွချီလာချိန်တွင် လူ့ပြည်၌ သီတင်းကျွတ်လပြည့်နေ့ မှောင်ရီပျိူးစအချိန်ဖြစ်သောကြောင့် မြို့သူမြို့သား အပေါင်းတို့သည် ဆီမီးများထိန်ထိန် ထွန်းညှိ၍ ဗုဒ္ဓမြတ်စွာကို ကြည်ညို သက်ဝင်သောဂါရဝတရားအပြည့်ဖြင့် ဦးညွှတ်ကြိုဆိုခဲ့ကြသည်ကိုအကြောင်းပြု၍ ခေတ်အဆက် ဆက် ဗုဒ္ဓဘာသာဝင်မြန်မာလူမျိူးတို့သည် သီတင်းကျွတ်မီးထွန်းပွဲတော် ကို ခမ်းနားစွာ လက်ဆင့်ကမ်းကျင်းပခဲ့ကြခြင်းဖြစ်သည်။
သီတင်းကျွတ်မတိုင်မီ ဝါတွင်းသုံးလပတ်လုံး ရဟန်းသံဃာတို့သည် မိမိတို့ကျောင်း သင်္ခန်းတွင်သာ သီတင်းသုံးကြရပြီး သီတင်းကျွတ်လပြည့်ကျော်မှသာလျှင် အရပ်တစ်ပါးသို့ ကြွချီခွင့်ရကြသည်။ ထိုအစဉ်အလာကိုအကြောင်းပြု၍ သာမန်လူတို့ကလဲ ထိုဝါတွင်းသုံးလ အတွင်း ထိမ်းမြားမင်္ဂလာပြုခြင်းကို ရှောင်ကြဉ်ကြပြီး ဥပုသ်သီလများဆောက်တည်ကြကာ ဝါကျွတ်ချိန်မှသာလျှင်ထိမ်းမြားလက်ထပ်ခြင်းအမှုကို ပြုကြလေသည်။
ရှေးအခါက သီတင်းကျွတ်လကို သန္တူလ (သန်တူလ) ဟုရှေးမြန်မာကျောက် စာများတွင်ခေါ်ဝေါ်ကြောင်းတွေ့ရှိရသည်။ သန်=စပါးပင်, တူ=ထူ ဟုအဓိပ္ပာယ်ရသောကြောင့် အနက်ဆိုသော် စပါးပင်များ ထူထူထောင်ထောင်ပေါက်သော လလည်း ဖြစ်သဖြင့် သီတင်း ကျွတ်ပွဲတော်ကို ပျော်ပွဲရွှင်ပွဲ၊ အလှူအတန်းများနှင့် အတူကျင်းပကြသည်။
ရှေးမြန်မာမင်းများလက်ထက်တော်အခါ သီတင်းကျွတ်ကာလတွင် ဘုရင်နှင့်မိဖုရား တို့အား ပူဇော်ကန်တော့သည့်ပွဲများကို နန်းတွင်း နန်းပြင်တို့၌ ကျင်းပခဲ့ကြသည်။ သီတင်း ကျွတ်လပြည့်နေ့၌ ဘုရင် မိဖုရားနှင့်တကွ နန်းတွင်းသူ နန်းတွင်းသား မြို့သူမြို့သားတို့ အားလုံး ရှစ်ပါးသီလကို ဆောက်တည်ကာ ကောင်းမှုကုသိုလ်များအတူတကွပြုကြသည်။
ခေတ်အဆက်ဆက် ဝါလကင်းလွတ် သီတင်းကျွတ်ချိန်ခါ ရောက်တိုင်း မြန်မာလူမျိူး တို့သည် စေတီပုထိုးများနှင့် ဆရာတော်ကြီးများသီတင်းသုံးရာ ကျောင်းသင်္ခမ်းများသို့သွား ရောက်၍ ပန်း၊ ဆီမီး၊ လှူဖွယ်ဝတ္ထုအစုစုတို့ကိုပူဇော်ကန်တော့ကြသည်။ မိမိတို့ နေရပ် သို့မဟုတ် လူကြီးမိဘ ဘိုးဘွားများရှိရာသို့ပြန်၍ မိမိထက်သက်ကြီးဝါကြီးသူတို့ကို ငယ်သူတို့က ရှိခိုးဂါရဝပြုကန်တော့ကြသည်မှာလည်း မွန်မြတ်သော ထုံးတမ်းအစဉ်အလာတစ်ခုပင်ဖြစ်သည်။
သီတင်းကျွတ်အချိန်အခါတွင် မီးထွန်းပွဲများသာမက မြတ်စွာဘုရား၏ အဘိဓမ္မာ တရားတော် ဖြစ်သော “ဓမ္မစင်္ကြာရွတ်ဖတ်ပူဇော်ပွဲ” နှင့် ရဟန်းတော်အချင်းချင်း အပြစ်မမြင်စေကြဘဲ ညီညွှတ်စွာ နေထိုင်ခြင်းကိုရှေးရှုသော ရဟန်း တစ်ပါးနှင့်တစ်ပါး ဖိတ်ကြားခြင်း၊တိုက်တွန်းခြင်း၊ တောင်းပန်ခြင်း အစရှိသော သာသနာတော်သန့်ရှင်း တိုးတက်ရေးအတွက် အပြုသဘောဆောင်သည့် “ပဝါရဏာပွဲ” များကိုလဲကျင်းပကြသေးသည်။
ယခုခေတ်သီတင်းကျွတ်ကာလတွင် ဆီမီးပူဇော်ပွဲ၊ ဓမ္မစင်္ကြာရွတ်ဖတ်ပူဇော်ပွဲ၊ ပဝါရဏာပွဲ များသာမက ဘုရားပွဲတော်၊ နိဗ္ဗာန်ဈေးပွဲတော်များ၊ သက်ကြီးပူဇော်ပွဲများ နှင့် ဆရာကန်တော့ပွဲများပါ ထည့်သွင်း၍ စည်ကားသိုက်မြိုက်စွာကျင်းပကြလေသည်။
မည်သို့ပင်ဆိုစေကာမူ သီတင်းကျွတ်ကာလသည် ရိုသေသမှု ဂါရဝတရားတို့နှင့်ပြည့်နှက်၍ ၁၂ လရာသီတွင် အစည်ကားဆုံး လတစ်လဖြစ်သည်ဆိုသည်ကတော့ ငြင်း၍ရမည်မထင်။
လိုတရအားပေးသူ ပရိသတ်တို့လဲ ကျန်းမာချမ်းသာစွာဖြင့် သီတင်းကျွတ်ပွဲတော်ကို ပျော်ရွှင်စွာဖြတ်သန်းနိုင်ပါစေကြောင်းဆုမွန်တောင်းလျက်။
Credit - လိုတရ
အရှင်ဇဝနဉာဏ အရှင်ဇဝနဉာဏ
No comments:
Post a Comment